Johny L.F.Tusing
India ram hi Khawvel hrieta hming serna, le hming inthangna chi tum tum a neia, chu hai lai ah a langsarna pawl tak pakhat chu Population (trend) in\hang dan hi anih. Kum 10 dan peia intiempui a um hlaka tukum 2011 hi vawi 15 intiempui(15th Indian National Census)na anih tah, 2001 khan nei anih a tukum 2011 hi India Intiemna ah a khir le uluk pawl tak ala ani nghe nghe.Tarik 1 April khan fel tak le kim takin 2011 Cencus mipui hrietin puong zâr aniha, mi a barakhai hle, mihriem Population 1.21 Billion or 121 Crore neiin Pasal 623.7 Million le 586.5 Million Nuhmei neiin 181 Million in mihriem ei punga Khawvel mihriem popo tiemin 100 ah 17.5 pei(17.5% of World Population) India mi ei tling phak, China ram khi 1.34 billion niin Khawvel mihriem tamna tak aniha (19.4% ) World Population an hluo, tamtak chu annih, adawta USA (308.7 million) hieng rambung pathum hin Khawvel mipui 40% an hluo . Amiruokchu India population in\hang dan enin Intiempui nawka chu ei khum ta ding niin anlang. India mi popo belkhawmin rambung 6 hieng- USA, Indonesia, Brazil, Pakistan, Bangladesh le Japan hai population leh an ang, Uttar Pradesh le Maharashtra State hai pahni chau in USA Population an zat a, India rama mipui tamna tak chu Uttar Pradesh niin mi 199 Million an uma mi 64, 429 chau neiin Lakshadweep chu mi tlawmna tak ani thung, ankar ahla hle, mipui tamna tak hmun(highest density) chu Delhi N-E District aniha KM biel(Sq.Km) sunga-mi 37,346 an uma Arunachal Pradesh Dibang Valley ah ruok chun KM biel sunga mi 1 chau a um ve thunga mi tlawmna taka ngai anih.
Inchukna tieng chu India in hma a sawn in a thaw \ha hle thung, 2001 khan Literacy rate 64.83% ana 2011 ruok hin chu 74.04% a kai dawr 9.21% in an \hang ei Population ngaituo chun a \ha ang reng hle, State wise ah Kerela Literacy rate an sang taka 93.91% anei, lekhathiem le Officer khawm an tam taka ngai aniha, tuta India rama IAS Top Officer hai hi Kerela mi ani deu tlang pui, India IAS sina a langsar pawl tak Home Secretary nilai mek Gopal K Pillai khawm hi Kerela mi anih, ei veng khawm Churachandpur phairuoma Vilage wise Literary rate ah dam Sawrkar sin nei dam, Gazetted Officer nei zat dam, Post Graduate le Graduate Percentage ieng zam ei tling ve ding ? \hang lak a va hun deh, hieng lai zing hin ei veng Class-XII Result chu kum tin ei thaw \hapeia lawm a um tukuma hlawtlingna ditum tak changtu hai kha Saikawt rose par rimtui \hatak, Olive thing hna mawi tak angin Saikhawpui sukvultu innih, lawm a um takzet . Mi’n an khuo lien vei le Officer hril ding an tam naw ngei an ti chang dam ei lung feia sun angin ana ngawi ngawi hlak, thangthar hai nasa nawk zuolin pu thar nawk ei tieu. Bihar State khu Literacy rate inhnuoi tak anih, 63.82% chau niin India rama mi rethei tamna le \am le harsatna ha’n an nuoi ngun khawp el, thiemna hi chu a lo hlu anih, Inchukna na chun thil hi a lo tluong pei chu anih, India ram State (UT \hangsa in) 10 Literacy rate 85% chuong an uma, chu hai laia North East State chu Mizoram le Tripura an \hang, State hmasawn pawl tak khawm an nih, Mizoram District pahni Serchhip (98.76%) le Aizawl(98.50%) hai Literacy rate an sang taka ngai anih.kum 2001-2011 sung hin Pasal Literacy rate chu 82.14% ana, Nuhmei ruok chu 65.46% ani thung.
Lekha inchuk thiem inchuk hi ro hlutak chu alo nih, tu I lak pek thei lo le inruk hmang thei lo aniha mitinin nei seng inla hmasawnna bulpui ning atih, India khawm \hang alak nasa a Literacy rate a \ha deu deu thil athaw thei deu deu bawk, 2020 hin India mipui popo thiem le ziek thiem vawng dinga hma lak mek aniha, chu motives tak el chu Thiemna hin Thilthawtheina(Power) anei a, ziek le tiem ei thiem vawng chun adang chu automatics ah hung inthleng el dingin ngai anih, inchukna hin iengkim a fûn khawma, “Hun lo liem ta hnung a thil tlung, vawisun a ei hun tawng mek tu –le- tu a thil tlung le zinga hun la um pei ding a thil la hung tlung ding hai popo vadung anga an luong khawmna an insung khawmna chu THIEMNA(Education) chau hi anih”
India mipui tam dan chu ei hriet tah, ei ni ring tu hai hin thaw ding ei va hau deh, ei Lalpa Isu Krista‘n thupek ropui tak ei liengko ah innghat mawphurna ami pek siha, Chanchin\ha hrildar le puongdar na hmun ding le la hre lo tam tak an in dâp el siha, sinthaw tu le Busîk tu hlak Population enin tiem khawm lo ei ni el sih, ei renga ei \hangruola, nangni keini ti um lova lungruol tak le pheikhai inruol takin hma ei lak tlang a \ul ta takzet Rawngbawlna sin hi Missionary, Pastors le Kohrana hlaw nei hai chau thaw dinga ngai pawl khawm an um, mani Kohran chaua rawngbawl tum khawm ei lo um pal thei mani biel sung chau amani, Khawvel lien lem tukver dang anthawk thlirin ei Kohran, ei biel hai ku hi a va chien lawm lawm deh!! Ei ni rawi chu a tel puiin Suol inhrie han Isu pan nuom lo, Thlarau mi han Isu pawimaw bawk lo ei ni tawla insiem \hatna ding ei nei chu a um anih, ei rawngbawlna ding le hmabak an kau el sia, huoisen taka Isu thlan pan tuhai in Thlan inhawng an hmua, beiseina lientak neia Thlan sunga in chawm lut tawp hai khan mi hmu ngai lo Van Angel an hmua , chu Vantirko thu awi han Thilthawtheina an chang ang khan huoisen takin ei fe na ding hmun pan ngam ei tieua, mi la hmu ngai lo malsawmna, lungawina, zalenna, lungmuongna le vangneina’n ami lo hmuok ding anih.
