Lalringlien Hmar
Khawvela hin ram bung hran hran, mania roinrelna (Indepandent Country) a tam em ema. Chuong ram bung tin hnuoia chun State (Governor inlalna) a um pei bawk. Chuonghai chun mani ram chita inbiek pawna tawng (Official/Common language) an nei chit bawk. Chuong vel zuk sui chiengna ding chun ei ram India ngei hi hei hmang ei tih.
India khawm hi khwvel ram dang Sawrkarin a hung thunun phak lo, mania roinrel (Independent) ram bung pakhat chu ei ni veh a. Chuong a ni lei chun English Tawng bakah, a ram mipuihai inbiek pawna ding tawng tlanglawn (Official/Common language) pakhat bek a ram mi tawng ngei nei a tula. Chuchu ding chun ‘Hindi’ hi hmang a lo ni tah a. Amiruokchu, India ram chu Hindi, piengpui tawnga hmangtuhai ram bik a nih tina lem chu a ni der nawh. India ram sunga hnam dang dang, ropui tak takhai hi mania tawng hran nei, hawrawp Alphabeth) hai khawm a hrana nei ngat vawng an ni tawla. An State-a hai chun hnam hrang hrang hai khawm an um ve vawnga, amiruokchu, an tawng tlanglawna ding chun hnam khat tawng bawk chu an hmang pei a nih. Chuong ang peiin Mizorama khawm hin Hnam hran tamtak ei um veh a, anachu, common language chu pakhat, tuta Mizo tawng ei ti hi a lo nih. Mizo group hai laia hnam hrang hrang tawnghai hin tuta Mizo tawng ei iti ngirhmuna hin chu an va ngir phak ve nawh a, Mizo hnam kaupenghai laia tawng pakhat ve a nizie ei hril nuom a ni chun Mizo-Hmar tawng, Mizo-Paite tawng tiha ei hril a tul. bengali, Madrasi, Punjabi, Asammese le a dang danghai tawng chu ‘Hindi’ a ni thei naw ang bawk khan, Mizo group-hai laia tawng po po chu ‘Mizo Tawng’ ti vawng thei a ni bik bawk nawh.
Chun eini rawi hi Mizo vawng ei ni dan hi zuk hril dep ei tih ie. Tuta Mizoram ei ti sawh a hma chun Lushai Hills ti a ni hlaka. Chuonga Lushai Hills ti a nina san khawm chu Sap Missionary-haiin Chanchin Tha thedar dinga an hung lut tir lai khan, Pawi, Lakher, Hmar, Lusei le a dang danghai hin an hnam chanpui le chi-le-kuong hai leh chengkhawmna hmun le khuo an satin an um khawm tlangpui deu tak hlak lei khan, an hung dawr le hung Contact hmasak hai chu unau Lusei tawng hmang pawl hai hi ni ngei awm an nih. An hnam hming an hang indawn chun Lusei hnam an ni thu an hril ngei ding a nih a. Saphai lo hriet dan chun Lusei chu Lushai ti angin an lo hreit ni ngei ding a na, Lushai tiin record an lo ziek taha. Ram khawm chu Lushai Hills an ti ta pei ni ngei ding a nih. (Hienglai tak hi chu zeldin thu a ni chuh). Chuong lai huna ei ram Lushai Hills tiha Sap Missionary-haiin an lo phuok chu, a ram neitu India Sawrkar hlak chun a ram sunga mi a ni ringawta chu a va uksak chuong nawh a, a hluotu ei Pi le Puhai kahn an nuom dan dana an nun le hun an hmangna ram, hnam le hnam, khuo le khuo indova, mani mihriem chanpuihai lu lak rawn (head-hunting) chu an inelna ropuitak a lo ni hlak. Chuong anga an nun an hmang pei lai chun Gospel Chanchin Tha chu a hung lut tah a. Kristien an hung ni ruol ruolin Khawvel politics tieng khawm an hung changkang pei a, kum 1950 vela khan chu, party pakhat, ‘Mizo Union,’ ti chu a hung pieng tah a, chu party-a chun a bik takin Hmar nauhai hi a thuoitu le a thangnasa active part latu an ni ve nghe nghe. Chu party motto chu Lal (Chief) hai thuneina peithlaka, democracy indin ding ti a na. Thang an lak nasa em em. Chu le inzawm chun hla khawm a hnuoia anghin an phuok nghe nghe:
‘Zalen ram hual a ngai tawh lo, Union-in kawng dal, a ti che;
Ti che, ti che, tum chinah bang tawh rawh.’ tiin.
Chun, Manipura khawm, a bik takin Hmar suka khun Mizo Unionn party chu an lo zawma, an thaw nasa ve em em el bawk. An ri inthang vel chu Manipur Reng, P.B. Singh chun a lo hrieta, Assam Rifles-hai thuoiin Hmar suka khun a zu fe tah a, Mizo Union memberhai chun an ti a, an lo tlansie a. Chu le inzawm chun hla an lo phuok bawka, hieng ang hin:
‘P.B. Singh a hung inzina, Assam Rifles a hung thuoi;
Union-haiin an lo ti a, Bufai le belte chawiin:
Tuikhur mawng tieng an tlan.’ tiin.
Pu P.B. Singh chun Hmar hotuhai chu an hmupuia, a thlema, “In unau, Lushai Hills tienga mihai le in inzawmna chu suktan unla, hi Union party activity hi in bansan chun, nangni Hmar nauhai hi Regional Council in umna areaa hin peng ka ti cheu,” a tih a. Amiruokchu, Union hotuhai chun Pu P.B. Singh a thuhril chu an pawm pek nawh a, Hmar nauhai ta dinga thil tha tak el chu an lo bawbuok an tha chuh. Iengkhawm nisien, Lushai Hills tieng chun an politics khel chu an hung hlawtling tah a, Lalhai thuneina khawm chu peithlakin a hung um tah a. Chuonga Politics tieng khawm an hung changkang pei hnung chun, ‘Lushai Hills’ ti khawm chu hman pakhat chau ram bik tina ang deu a ni lei le eini Mizo groupa hnam popo umna ram a ni leiin ‘Mizo District’ tiin an thlak nawk ta lem a nih. Chuongchun, Lushai hills ti halk kha Mizo District ti a hung ni tah a, Politics rama hmasawnna hung peiin State puitlinga hlangkai a hung ni ta pei a, a State hminga khawm ‘Mizoram,’ ti a hung ni ta pei sawh. Chuleiin, ei reng hin Mizo vawng ei na, Mizoram khawm sawh ei renga ei ram a ni bawk.
Chuong a ni lei chun Mizo inti amanih, Mizo Upa Pawl, inti amanih khawm hi inzak ding le inthlahrung ding a ni der nawh. ‘Mizo Upa Pawl,’ ti hi khaw tinah ei um a, siet nia intawiawmna tha tak pakhat ve a nih a. Saikawta khawm hin member 160 neka tam ei um tah a, ei pung pei bawk. Chun ka hril nuom tak chu Siet nia inthawiawma ei inral huna hin mi tam tak chu Mizo anga inngai tak tak thei naw ang deu le inzak deu duk ang rengin ei um ni’n an lang a, thilpek ei inhlan laia mani ngirhmun senga lo ngir ding ti le kuong bla Mizo Upa Pawl thlalak ding hang ti changkhawm hin, tamtak chu ei inkiltawi tlat. Hi hi thaw naw chi ni’n kei chun ka ngai ve a nih. Mizo vawng ei na, ei reng hin Mizo ei ni hih.
